Orain dela urteak egin genuen abestiaren titulua izan daiteke bidaia. Beranduago Bidaiatzen ere kantatu izan dut. Azkenean bizi egin dut; eta nola. Bidaiatzen bizi naiz azken aldian, eta niretzako bidai bat ez da atzerrira joatea derrigor. Batzuetan, herritik irten gabe ere erraz bidaiatzen da.

Gero eta merkeago da Europan barna murgiltzea, edo hegazkin ekonomiko (ez (eko)logiko) bat hartu eta beste puntara joan. Mugak desagertuz doaz, eta Kubara pultserarekin bidaiatzen du jendeak, eta Kuba ikusi duela esan. Kubatar emaztea ekarriko du gainera.

Niretzat bidaiatzea ez litzateke izango Frankfurtera bigarrenez joatea. Bidaietan leku berriak ezagutu behar dituzu (eta ez dut esan nahi, bigarrenez joanda ezagutuko ez nituzkeenik), eta gehienbat ezberdin sentitu (izan gauza, kolore, forma, soinu, material, argi, usain, janari….), eta hori gaur egungo turistak ez du oso atsegin. Bai, joan zaitezke Greziara, edo Kroaziara, eta han etxean bezala (izan Donosti zein Salou) sentitu, McDonaldsean janez, eta Bershkan 4 eurotan kamiseta bat erosiz. Bidai ederra. Gastronomia bikaina. Souvenir apartak…. ai ene, a ze bidaia.

Kotxean, bidai batetik nentorrela, berriz ere bidaiatu dut une batez, Mikel Laboak lagunduta:

Maite ditut
maite
geure bazterrak
lanbroak
izkutatzen dizkidanean
zer izkutatzen duen
ez didanean ikusten uzten
orduan hasten bainaiz
izkutukoa…
nere baitan bizten diren
bazter miresgarriak
ikusten.

Lanbro artetik irten naizenean, nire hurrengo bidaia ikusi dut STOP seinalearen atzean, esperoan. Izan ere, etzi noa Marokora bigarrenez, nahiz eta Portugal kuttunean hirugarren aldiz egon berri naizen.

Oraingoan ez daramat argazki kamera. Faltan botako dut. Eta faltan botako ditut zenbait txakur (animaliak), eta zenbait pertsona, eta zenbait irudi. Baina berehala hemen izango naiz, gauza berriekin, eta nork daki zenbat bidaiekin.

Laster arte.

LourdesLovers garaiaren aurretik egindako hausnarketa ttikia:

Diskoa biraka hasi zen, eta prz baten ondoren lehen sinuek elkarrekin talka eginez armonia kausal bat osatu zuten atea irekitzean egindako biolin zaratarekin batera. Jokin zen.

- Kaixo Pako!
- Hemen, diska pare honi lehen entzunaldia eskaintzen.
- Bai; inoiz pentsatu al duzu zinera beharrean etxean musika jarri, begiak itxi eta horrelako, musikodromo batean zaudela imajinatzea?
- Egia esan ez, baina film mutuak zinean ikusten baditut, zergatik ezin ditzaket diskoak belarriekin entzun eta 45 minutuz beste nonbaitera bidai egin?
- Horixe bera. Batzuk, musika gauzak egiten dituzten bitartean soilik dakite “erabiltzen”. Normalean pelikula bat ez duzu harrikoa egin bitartean ikusten, eta liburu bat ez duzu txortan ari zarela irakurtzen.
-Hmm… Biolentzia tantekin ez iezazkidazu zapatilak zikindu! Zer gertatu zaizu bada?
-Ba kaletik nator, Jonekin egon naiz. Eta zera esan dit: <Ingeniaria zara eta, nola sormen lan bat nahi duzula?, zu arazoak konpontzeko SORTUA zara>. Ta tira, nik uste dut, hasteko ez naizela inongo unibertsitatetan SORTUA izan, ni nire amaren alutik atera bainaiz. Hortaz gain, esango nuke ni pertsona naizela, eta pertsona bezala SORMENA dudala; adibidez hitzak sor ditzaket, hotsak, irudiak…. Nola ezin dudala sormen lanik egin? Eta nola ezin dutela ingeniariek sormen lanik egin?? Ingeniaritza arte miragarri bezala ez da kontsideratzen baina aizu, arte dezente behar da zenbait ingeniari lanentzako eh!
- Bai, latinaren ingenĭum hitzetik garatu da, hau da, pertsona buruargia litzateke ingeniaria.
-Badira sormenik ez dutena, bai ingeniaritzan, bai arkitekturan, bai marrazketan, musikan, edo beste mila lekutan, ez dut uste inongo zentzurik daukanik Jonek esandakoak.
- Guztiz ados, baina aizu: zergatik ez gara pixkatean isiltzen eta musikodromoaren esperientzia bizi. Beranduago diskari kritika eginen diogu, ados?

Adostasunez begiak itxi zituzten eta te egin berriaren kearen konpainian kontzentratuz, orratzaren marruskadurak minutuko ematen zituen hogeita hamairu biratan emititutako dardara aditzeraino. Nota bakoitza espektroan kokatzen zuten, puzzle handi bat zen zelai infinituan. Denboran bidaiatzen zuten, frekuentzian, espazioan, baita espektro kromatikotik ere, eta osagai guztiek egindako sua batzuetan gar biziz astintzen zuen basoa, eta hilez, basamortu bihurtu. Haizearekin grisak sortzen ziren itsaso ilunean, eta harea odolez bustitzen zen, haziz betetako zuloa bezala.